Vergleichswettkampf Hedingen 2023
Protokoll Krisensitzung nach dem Vergleichswettkampf 2023
Anwesend: OT’s
Sabine: Sali du
Leana: Möörgelii
S: Mer hend imfall scho Mittag gell.
L: Ja bi halt ersch gad ufgstande… Isch wieder chli spat worde gester. Bisch au nachli müed?
S: Es gat eigendli no, aber Muskelkater hani.
L: Ja säg nüt, ich gspür au de ganz Körper!
S: Haha. Und was meinsch so zu eusne Leistige?
L: Hmm luege mer die Sach mal a. Gstartet hemmer ja mit Witsprung, Note7.56… Joa, wür sege da isch na dütlich me Luft geg obe.
S: Definitiv! Die Bei müend na wiiter füre, bi allne! Aber mer hends ja au noni sooo viel chöne trainiere, muss mer scho au gseh. Bis im Juni gaht da scho no öppis.
L: Ja bringe mer ane. Nachher Steistosse – isch amel nöd so schlecht gsi würi sege. De eint oder ander muen nachli am Alauf schaffe und chli meh Mukis trainiere, aber d Note vo 8.83 isch schomal e gueti Basis.
S: Ja iverstande. Liegestütze sind scho ufem Programm. Chömmer alli guet bruche. Chöme mer zum Fachtest. Aso da simmer eus en besseri Leistig gwöhnt. Die Teams müend sich no meh finde.
L: Hmmm, viellicht wür da e Paartherapie helfe?
S: Guete Punkt… ich wür sege mir lueged die Sach ime Monet nomal a, wenn denn d Note nani höcher wie 8.22 isch, schicked mers id Therapie. A wer hesch da denkt?
L: Ich het jetzt de Dr. phil. Thomas Aregger vorgschlage… de isch scho lang im Business und schliessli au de Präsi …
S: Also guet, hanen mal ufgschriebe.
L: Guet, chöme mer zum zweite Sorgechind: Pendelstafette. Ja was söli säge… we need more speed!
S: Ja, ha scho im Qualipet glueget, git na gueti Peitsche dört…
L: Meinsch chömmer das uf euses Budget neh?
S: Ja sötti scho ga, unter de Rubrik «besondere Auslagen».. und susch muen jede, wo z langsam isch, 5 Fr. is Kässeli zahle.
L: Gueti Idee, und bime Übergabefehler gad namal 5 druf! Mache mer so. Hochsprung hingege isch verhältnismässig ned schlecht gsi… 8.35 hets geh.
S: Ja das hends guet gmacht, au die wo susch amel kei Hochsprung mached und sich hend wele usprobiere. Gits für alli es Schöggeli zur Belohnig.
L: Ok, aber wüki nume eis, susch flügeds de nöchst mal nöm so höch.
S: Ja klar, versproche. Aber he, hesch die drü Plauschdiszipline scho gseh? Da hemmer alles abgruumet: Im Lieder guurgle, Türmli baue und au im Tabuu!
L: Ja voll! Bim Seich mache sinds unschlagbar, die cheibe Ottebacher.
S: Ja würkli! Het viel zu eusem Gsamtsieg debi zuetreit.
L: Jep, dumm eigendli gits das am Turnfest nöd.
S: Ja, chönnt mer ja mal beaträge…De vierti Wertigsteil au gad!
L: Ja det gwünne mer ja eh immer. Ou chunnt mer na in Sinn, hemmer de Hediger scho danked fürs Esse wos gsponseret hend?
S: Öh ja glaub scho… bide Siegerehrig hesches doch erwähnt, het sogar Applaus ge. Für euses spendierte Getränk au.
L: Ah ja blöd, hani scho wieder vergesse. Vo dem hets de übrigens au nüm viel vorig gha, hend alli chli Turst gha nachem Wettkampf.
S: Haha ja das isch ja nüt Neus. Ich wür sege, alles i allem en glungne Alass oder?
L: Absolut! Het Spass gmacht. Aso he, muen nachli go pfüsele… mer gseht sich nöchst Zistig wieder im Training!
S: Ja voll, denn wird die Bandi nochli meh in Shape bracht!
–Gioia Strebel–
